មាត្រា២៧ នៃច្បាប់ស្តីពីអគ្គីសនីនៃព្រះរាជាណាចក្រកម្ពុជាបានចែងថា អាជ្ញាធរអគ្គិសនីកម្ពុជា មានថវិកាស្វយ័ត មួយ សម្រាប់កិច្ចប្រតិបត្តិការរបស់ខ្លួន។ ថវិកានេះគឺកម្រៃដែលអ្នកសុំអាជ្ញាប័ណ្ណ និងអ្នកកាន់អាជ្ញាប័ណ្ណត្រូវបង់​ តាមការ កំណត់របស់អាជ្ញាធរអគ្គិសនីកម្ពុជា។ កម្រៃនេះហៅថា កម្រៃអាជ្ញាប័ណ្ណ ។ ថវិការបស់អាជ្ញាធរអគ្គិសនីកម្ពុជា ត្រូវតម្កល់ ក្នុងគណនីមួយ នៅធនាគាររបស់រដ្ឋក្នុងព្រះរាជាណាចក្រកម្ពុជា។ មានតែអាជ្ញាធរអគ្គិសនីកម្ពុជាទេដែលមានសិទ្ធិ ប្រើប្រាស់ថវិកានេះ ។​

         កម្រិតអតិបរមានៃកម្រៃអាជ្ញាប័ណ្ណ ត្រូវកំណត់ដោយអនុក្រឹត។ ក្នុងករណីមានសំណល់ថវិកា នៅដំណាច់ឆ្នាំ ណាមួយ អាជ្ញាធរអគ្គិសនីកម្ពុជាត្រូវផ្ទេរសំណល់ថវិកានេះទៅប្រើប្រាស់​ សម្រាប់គម្រោងថវិកាឆ្នាំបន្ទាប់ទៀត។ ចំពោះ សំណល់ថវិកា ឬកង្វះថវិកាដូចមានចែងក្នុងវាក្យខ័ណ្ឌខាងលើ អាជ្ញាធរអគ្គិសនីកម្ពុជាត្រូវកែសម្រួលកម្រៃអាជ្ញាប័ណ្ណ ឡើងវិញសម្រាប់គម្រោងថវិកាឆ្នាំបន្ទាប់។ ក្នុងករណីកែសម្រួលកម្រៃអាជ្ញាប័ណ្ណរហូតដល់កម្រិតអតិបរមារួចហើយ  ប៉ុន្តែនៅតែពុំអាចទ្រទ្រង់កិច្ចប្រតិបត្តិកា​ររបស់ខ្លួន ព្រមទាំងសងបំណុលរួមទាំងការប្រាក់បាន អាជ្ញាធរអគ្គិសនីកម្ពុជា ត្រូវធ្វើសំណើទៅរាជរដ្ឋាភិបាល ដើម្បីពិនិត្យសម្រេចកម្រិតអតិបរមានៃកម្រៃអាជ្ញាប័ណ្ណជាថ្មីឡើងវិញ។ កិច្ចប្រតិបត្តិការ ហិរញ្ញវត្ថុ និងគណនីរបស់អាជ្ញាធរអគ្គិសនីកម្ពុជា ត្រូវប្រតិបត្តិតាមប្រព័ន្ធគណនីសាធារណៈ ។

         កម្រៃអាជ្ញាប័ណ្ណអតិបរិមា ត្រូវបានកំណត់ដោយអនុក្រឹត្យលេខ ១៣១ អនក្រ.នប ចុះថ្ងៃទី២៧ ខែធ្នូ ឆ្នាំ២០០១ ដែលមានខ្លឹមសារដូចខាងក្រោម៖

កម្រៃស្នើសុំអាជ្ញាប័ណ្ណៈ

ក-

ចំពោះការស្នើសុំអាជ្ញាប័ណ្ណធ្វើសេវាកម្មអគ្គិសនីដែលមានលក្ខណៈអនុគ្រោះ (អគ្គិសនីជនបទ) កម្រៃស្នើសុំ​​​

អាជ្ញាប័ណ្ណ មិនត្រូវលើសពីហាសិបពាន់រៀល (៥០,០០០រៀល) ក្នុងអាជ្ញាប័ណ្ណមួយ។

ខ-

ចំពោះការស្នើសុំអាជ្ញាប័ណ្ណ ធ្វើសេវាកម្មអគ្គិសនីធុនតូច តូចជាងប្រាំរយ (៥០០) គីឡូវ៉ាត់ កម្រៃស្នើសុំអាជ្ញាប័ណ្ណ មិនត្រូវលើសពីមួយរយពាន់រៀល (១០០,០០០រៀល) ក្នុងអាជ្ញាប័ណ្ណមួយ ។

គ-

ចំពោះការស្នើសុំអាជ្ញាប័ណ្ណធ្វើសេវាកម្មអគ្គិសនីធុនមធ្យម ពីប្រាំរយ (៥០០) ទៅបីពាន់(៣០០០) គីឡូវ៉ាត់ កម្រៃស្នើសុំអាជ្ញាប័ណ្ណមិនត្រូវលើសពីប្រាំមួយរយពាន់រៀល (៦០០,០០០រៀល) ក្នុងអាជ្ញាប័ណ្ណមួយ ។

ឃ-

ចំពោះការស្នើសុំអាជ្ញាប័ណ្ណ ធ្វើសេវាកម្មអគ្គិសនីធុនធំ លើសពីបីពាន់ (៣០០០) គីឡូវ៉ាត់ កម្រៃស្នើសុំអាជ្ញាប័ណ្ណ មិនត្រូវលើសពីមួយលានរៀន (១,០០០,០០០រៀល) ក្នុងអាជ្ញាប័ណ្ណមួយ ។

កម្រៃអាជ្ញាប័ណ្ណៈ

ក-

ការផលិតអគ្គិសនី ឫការទិញអគ្គិសនីពីក្រៅប្រទេសៈ កម្រៃអាជ្ញាប័ណ្ណធ្វើសេវាកម្មមិនត្រូវ លើស ពី ១,៧០រៀលក្នុង ១ គីឡូវ៉ាត់ម៉ោងនៃថាមពលបញ្ចោញ ឫទិញចូលឡើយ ។

ខ-

ការបញ្ជូនអគ្គិសនីៈ កម្រៃអាជ្ញាប័ណ្ណធ្វើសេវាកម្មមិនត្រូវលើសពី ០,៧០រៀលក្នុង ១គីឡូវ៉ាត់ម៉ោង នៃថាមពល បញ្ជូនឡើយ ។

គ-

ការចែកចាយ និងលក់អគ្គិសនីៈ កម្រៃអាជ្ញាប័ណ្ណធ្វើសេវាកម្ម មិនត្រូវលើសពី ១,២០រៀល ក្នុង ១គីឡូវ៉ាត់ម៉ោង នៃថាមពលលក់​ឡើយ ។

ឃ-

ការធ្វើសេវាកម្មលក់រាយៈ កម្រៃអាជ្ញាប័ណ្ណធ្វើសេវាកម្ម មិនត្រូវលើសពី ០,៥០រៀល ក្នុង១គីឡូវ៉ាត់ម៉ោង នៃ ថាមពលលក់ឡើយ ។

ង-

ការធ្វើសេវាកម្មក្រោមអាជ្ញាប័ណ្ណផ្សេងៗទៀតៈ កម្រៃអាជ្ញាប័ណ្ណធ្វើសេវាកម្ម មិនត្រូវលើសពី ០,១០ភាគរយ នៃ ថ្លៃសេវាកម្មឡើយ ។

ការកំណត់កម្រៃអាជ្ញាប័ណ្ណ ដោយអាជ្ញាធរអគ្គិសនីកម្ពុជាៈ

      អាជ្ញាធរអគ្គិសនីកម្ពុជាបានកំណត់កម្រៃអាជ្ញាប័ណ្ណ សម្រាប់ឆ្នាំ២០០៥ ដូចខាងក្រោមៈ

ក-

ការផលិតអគ្គិសនី ឫការទិញអគ្គិសនីពីក្រៅប្រទេសៈ ១,៥០រៀល ក្នុង១គីឡូវ៉ាត់ម៉ោង នៃថាមពល បញ្ចោញ ឬទិញចូល ។

ខ-

ការបញ្ជូនអគ្គិសនីៈ ០,៥០រៀល ក្នុង១គីឡូវ៉ាត់ម៉ោង នៃថាមពលបញ្ជូន ។

គ-

ការចែកចាយ និងលក់អគ្គិសនីៈ ០,៩០រៀល ក្នុង១គីឡូវ៉ាត់ម៉ោង នៃថាមពលលក់ ។

ឃ-

ការធ្វើសេវាកម្មលក់រាយៈ ០,៥០រៀល ក្នុង១គីឡូវ៉ាត់ម៉ោង នៃថាមពលលក់ ។

ង-

ការធ្វើសេវាកម្មក្រោមអាជ្ញាប័ណ្ណផ្សេងៗទៀតៈ កម្រៃអាជ្ញាប័ណ្ណធ្វើសេវាកម្ម មិនត្រូវលើសពី ០,១០ភាគរយ នៃ ថ្លៃសេវាកម្ម ៕